Dagskráin er enn í mótun. Hægt er að senda hugmyndir og viðburði á kristin@blonduos.is fyrir 15.júní 2021.
Húnavaka, bæjarhátíð Blönduósinga, verður haldin dagana 15. -18. júlí 2021. Er þetta í átjánda sinn sem hátíðin er haldin og verður um nóg að velja fyrir gesti og gangandi. Dagskrá hátíðarinnar verður fjölbreytt og eitthvað í boði fyrir alla aldurshópa.
Að venju munu Blönduósingar skreyta hús sín og garða með alls konar fígúrum fyrir hátíðina, hvort sem er í þéttbýli eða dreifbýli. Verðlaun verða veitt fyrir best skreytta húsið, frumlegustu og flottustu fígúruna og fyrir götuna með flestar fígúrur. Bjórbingó verður svo að kvöldi fimmtudagsins í Félagsheimilinu.
Föstudaginn 16.júlí verður bókamarkaður á Héraðsbókasafninu kl 13 og verður opinn alla helgina og einnig mun Flugklúbbur Blönduóss bjóða upp á útsýnisflug alla helgina ef verður leyfir. Síðdegis verður fjölskylduskemmtun á skólalóðinni að ógleymdu Kótilettukvöldi í Eyvindarstofu.
Laugardagurinn 17. júlí er svo hápunktur hátíðarinnar en þá fer fram golfmót á Vatnahverfisvelli, opið mót í ólympísku skeet verður á skotsvæði Markviss og árlegt Blönduhlaup USAH. Meðal dagskráliða yfir daginn verður söguganga um gamla bæinn, útsýnisflug, tónleikar, fótboltaleikur og margt fleira. Dagurinn endar á balli í Félagsheimilinu.
Sunnudaginn 18. júlí verður hin árleg Prjónaganga á Húnavöku, sápurennibraut í brekkunni fyrir neðan kirkjuna, Stofutónleikar í Heimilisiðnaðarsafninu og fleira.
Frekari upplýsingar um hátíðarhöldin og dagskrá Húnavöku 2021 verður að finna á Facebook síðu hennar.